Dr. Khwaja Ekram Prof. Dr. Khwaja Mohd Ekramuddin
Related Articles
عید پھر آئی اورچلی گئی ۔یہ توخوشی کا موقع ،اللہ کے انعام پر شکر ادا کرنے کا دن۔لیکن جب میں اپنے وطن کے ان بے شمار لوگوں کو دیکھتا ہوں جن کے پاس عید کے دن بھی پیٹ بھر کر کھانے کو تھا اورنہ ان کے بچوں کیلئے ،نئے تو کیا صاف ستھرے کپڑے بھی نہیںتھے تو نجانے یہ شعر کیوں بے ساختہ میری زبان پر آجاتا ہے ۔
ہوئی عید سب نے پہنے طرب و خوشی کے جامے نہ ہوا کہ ہم بدلتے یہ لباس سوگواراں
اور ایسے لوگ بھی تو بے شمار ہیںجو اللہ کی عطا کردہ بے شمار نعمتوں سے اگر کچھ حصہ ان کو دے دیتے جو بے وسیلہ ہیں تو ان کے چہروں پر بھی مسکراہٹ آجاتی،ان کی آنکھوں سے اداسی ایک دن کیلئے ہی سہی،مفقود ہو جاتی اور خوشیاں رقص کرنے لگتی۔مجھے مدینہ منورہ کا وہ یتیم بچہ یاد آرہاہے جس کے سر پر رحمت العالمین رسول اکرمﷺ نے ہاتھ رکھا توگویا اسے دنیا کی سب سے بڑی نعمت مل گئی تھی۔کیا اس کے امتیوں کو رحمت العالمین رسول اکرمﷺ کی یہ سنت یاد نہیں رہی؟کیا قرآن کریم میں یہ نہیں کہا گیاکہ’’تم نیکی کو نہیں پہنچ سکتے جب تک کہ اپنی وہ چیزیں (خدا کی راہ) میںخرچ نہ کرو جنہیں تم عزیز رکھتے ہو۔‘‘اور پھر فرمایا’’تم نے دیکھا اس شخص کو جو آخرت جزا و سزا کو جھٹلاتا ہے ؟وہی تو ہے جو یتیم کو دھکے دیتا ہے اور مسکین کو کھانا دینے پر نہیں اکساتا‘‘۔یعنی نہ اپنے نفس کو اس کام پر آمادہ کرتا ہے اور نہ اپنے گھر والوں سے کہتا ہے کہ مسکین کو کھانا دیا کریں اور نہ لوگوں کو مسکین کی مدد پر اکساتا ہے ۔ سبحان اللہ!رب العزت نے یتیموں اور مسکینوں سے بدسلوکی کرنے اور کھانا نہ دینے یا دوسروں کو اس کیلئے آمادہ نہ کرنے کا تعلق ’’یوم دین‘‘کو جھٹلانے سے جوڑا ہے ۔ یعنی یتیموں اور مسکینوں کی مدد نہ کرنے والے وہ ہیںجو یوم آخرت اور جزا و سزا پر ایمان نہیں رکھتے اور ظاہر ہے انہیں مسلمان نہیں کہا جا سکتاتو گویامسلمان ہو نے اور یوم آخرت پر ایمان رکھنے کی ایک شرط یہ بھی ہے کہ یتیموں کو گلے لگایا جائے،ان سے شفقت سے پیش آیا جائے اور یتیموں ،نا داروں اور مسکینوں کو خود بھی کھا نا کھلایا جائے اور دوسروں کو اس پر آمادہ کرنے کیلئے باقاعدہ مہم بھی چلائی جائے۔
ان آیات مبارکہ کی روشنی میں آج اپنے اپنے کردار اوع عمل کا جائزہ لیجئے۔بیشک بنیادی ذمہ داری تو حکمرانوں کی ہے جو عوام سے ٹیکس اسی لئے وصول کرتے ہیں کہ عوام کی فلاح و بہبود پر خرچ کیا جائے۔بینکوں کے ذریعے سال پورا نہ ہو نے اور نصاب کو نہ پہنچنے والی رقم پر بھی زکوٰۃکا ٹ لی جا تی ہے تاکہ ناداروں پر صرف کی جائے لیکن پھر بھی ناداروںغریبوں اور مسکینوں کی تعداد بڑھتی جا رہی ہے ۔ایسا کیوں ہے؟کیا مسلمانوں کے حکمران یوم آخرت پر یقین نہیں رکھتے یا نظام زکٰوۃ صحیح طور پر نافذ نہیں کر سکے۔
اپنے طراف میں نظر ڈالئے آپ کو کتنے ہی نادار ‘مسکین اور یتیم بچے کوڑے پر رزق تلاش کرتے نظر آجائیں گے ۔ معصوم سی بچے جو کچرے میں پھینکے گئے گلے سڑے اناروں سے اپنی بھوک مٹانے کی کوشش کر تے ہیں ‘ایسے بچے ہر جگہ اور ہر شہر میں آپ کو ملیں گے۔’’کیا تم نے دیکھا ان لوگوں کو جو جزا و سزا کو جھٹلا رہے ہیں‘‘۔کیا ہم بھی تو ان میں شامل نہیں؟ورنہ یہ کیسے ممکن ہے کہ ایک مسلم معاشرے میں ،ایک اسلامی ملک میں جگہ جگہ ننگے بھوکے لوگوں کی بھیڑ نظر آئے اور معاشرہ ان سے آنکھیں چرالے؟فرمان الٰہی تو یہ ہے کہ مسلمان اس وقت تک نیکی کو نہیں پہنچ سکتے جب تک وہ اپنی ایسی چیزیں اللہ کی راہ میںخرچ نہ کر دیں جو ان کو بہت عزیز و محبوب ہیں۔ہم روزے رکھ کر،نماز پڑھ کر،حج اور عمرے کی ہر سال سعادت حاصل کر کے خود کو نیکو کاروں میں شمار تو کر تے ہیں،پڑوسی بھوکا ہو،محلے میں یتیم،مسکین اور ناداربیوائیں بے سہارا ہوں اور ہم عمرے کیلئے دوڑے چلے جائیں جو فرض نہیں ہے ،حج بھی زندگی میں صرف ایک بارمخصوص شرائط کے ساتھ فرض کیا گیا ہے پھر بھی کتنے ہی لوگ فخریہ گنواتے ہیں کہ انہوں نے کتنے حج کر لئے۔گھر کے باہر نام کی تختی پر جلی حروف میں ’’الحاج‘‘ لکھوا رکھا ہے،ہرکسی سے ’’حاجی صاحب‘‘ سننے میں سرشاری محسوس کرتے ہیں۔لیکن یہ تو بتائیں کہ اللہ کی راہ میں کتنا خرچ کیا،کتنے یتیموں،ناداروں اور مسکینوں کو سہارا دیا ،اپنی کتنی محبوب اشیاء اللہ کی راہ میں خرچ کر دیں،ایسا ہوتا تو آج کوڑے کے ڈھیر پریہ بچے نظر نہ آتے جنہیں دیکھ کر یہ تمیز کرنا مشکل ہو گیا ہے کہ یہ انسان کے بچے ہیں یا پھر اسی کوڑے کرکٹ اور کچرے کا حصہ!
اللہ کا شکر ہے کہ کئی تنظیمیں ان حالات میں بھی یتیم،مسکین اور ناداربیوائوں کی نہ صرف خود مدد کر رہی ہیں بلکہ دوسروں کو بھی اکسا رہی ہیں۔شاید اسی لئے زلزلے آآ کر پلٹ جاتے ہیںاور آسمان سے بارش بھی برس جا تی ہے کہ کھیتیاں سوکھنے نہ پا ئیں لیکن ہر کوشش نا کافی ہے کہ غربت میں اضافے اور یتیموںمسکینوں ناداروں کی تعدا بڑھانے کی منظم مہم اس سے کہیں زیادہ شدید ہے۔ آگے بڑھئے آپ کو اپنے عزیزوں رشتہ داروں میں ایسے سفید پوش،نادار غریب مل جائیں گے جو آپ کی توجہ اور مدد کے طالب ہیں۔ان کی مدد کرتے ہوئے ان کی عزت نفس کا خیال رکھنا بہت ضروری ہے۔ جب میں نے بالآخر ان سے عزت نفس کے خیال رکھنے کا بہترین طریقہ دریافت کیا تو حسب عادت مسکرائے کہ پگلے دنیا میں سب سے آسان کام بھی یہی ہے اور سب سے مشکل بھی۔’’آپ آسان زباں میں کیوں نہیں بتاتے ،ایسے جواب سے تو الجھن بڑھتی ہے؟‘‘فرمانے لگے ’’مشکل اس لئے ہے کہ اپنے کسی عزیز یا رشتہ دار کو دیتے ہوئے دل کے کسی گوشے میں برتری کا احساس ہر نیکی برباد کر دینے کا احتمال رہتا ہے لیکن اگر یہی کام اس طرح کیا جائے کہ اس عزیز یا رشتہ دار کو پتہ نہ چلے کہ یہ مدد آپ کر رہے ہیں،یہی کام اپنے کسی ایسے دوست کے ذریعے کریں جو ان کیلئے اجنبی ہوتو پھر دونوں اطراف میں خیر باقی رہتی ہے۔
ہم اپنی زیست کے پیہم مسرت خیز لمحوں سے ایک ساعت ہی سہی،انہیں صرف یاد ہی کر لیںجوہماری سلامتی کیلئے اپنی جان ہتھیلی پررکھ کراپنی جانیں قربان کرنے سے دریغ نہیں کرتے۔ابھی کل ہی کی بات ہے کہ گلگت میںہمارے دوست ملک چین کے علاوہ دیگرممالک کے گیارہ کوہ پیماؤں کودہشتگردی کا نشانہ بناتے ہوئے ہلاک کردیاگیااوراب اس معاملے کی تحقیقاتی کمیٹی کے تین اعلیٰ افسروں کوگلگت بلتستان کے ضلع چلاس میں ایک حملے میں قریبی ضلع دیامیر کے ایس ایس پی محمد ہلال، پاکستان فوج کے ایک لیفٹیننٹ کرنل مصطفی جما ل جسے اقبالیات پرحیرت انگیزطورپرعبورحاصل تھا اورکیپٹن اشفاق کو شہید کردیاگیا۔دوسری طرف کوئٹہ سے پنجاب جانے والے۱۳پنجابی مسافروں کوشناخت کرکے بسوں سے اتار کر پہاڑوں میں لے جایا گیا جہاں سے ان افراد کی لاشیں صبح کے وقت ملیںاوربعدازاں ایک ایس ایچ او محب اللہ جس کوانہی افرادنے کوگولی مارکرشہیدکردیاتھا،اس کے نماز جنازہ میں بم دہماکہ سے تادمِ تحریر پولیس کے اعلی اہلکار وں ڈی آئی جی آپریشن فیاض احمد سنبل، ایس پی انور خلجی، ڈی ایس پی شمس سمیت۳۰ افراد ہلاک اورچالیس زخمی ہو گئے ہیں ۔ دراصل یہ ملک دشمن طاقتیں جنہوں نے اپنے انہی ایجنٹوںسے پہلے بنوں جیل اوربعدازاں۳۰جولائی کوڈیرہ اسمعیل خان جیل پرحملے میں ۲۴۳دہشتگردوں کو لیکر فرار ہو گئے تھے اور اب پاکستان کی مزیدجیلوںمیں ایسی ہی کاروئیوںکی دہمکیاں دے رہے ہیں۔
اس علاقے میںایسے گھناؤنے واقعات نے اسی دن سے جنم لیناشروع کردیاجب چینی صدرکے پاکستان کے دورے پرکاشغر سے گوادرتک ریلوے ٹریک تعمیرہونے کااعلان کیاگیااورجب اس معاہدے کی تکمیل کیلئے میاں نوازشریف چین میں موجودتھے توٹھیک اسی دن ان دہشتگردقوتوں نے اپنے ایجنٹوں کے ہاتھوںچین کے کوہ پیماؤں کوہلاک کردیا۔یقینا وہی طاقتیں سرگرم عمل ہیںجن کے مفادات پرکڑی ضرب لگنے کاخطرہ ہے اوروہ سمجھتے ہیںکہ اس منصوبے سے اس خطے کی تقدیربدل سکتی ہے اوران طاقتوںکی چیرہ دستی سے یہ خطہ نہ صرف محفوظ ہوجائے گابلکہ اسے ایک معاشی آزادی بھی حاصل ہوجائے گی۔اسی لئے انہوں نے نہ صرف(خدانخوستہ) پاکستان کو تباہ کرنے کا پروگرام بلکہ چین کوبھی اس پراجیکٹ کوختم کرنے کاپیغام دیاہے جس کیلئے انہوں نے القاعدہ اوردیگرتکفیری گروپوںکوباقاعدہ متحرک کردیاہے۔اب یہ بات کھل کرسامنے آگئی ہے کہ القاعدہ پہلے خفیہ طورپرقصرسفیدکے فرعون کے احکام کی تعمیل میں مصروف تھی اورامریکانے اسے پہلے معمرقذافی کاتختہ الٹنے کیلئے استعمال کیا،بعدازاں تیونس میں بھی وہی مکروہ کھیل کھیلاگیااوراب کھل کرشام اورپاکستان میںگلگت اوربلوچستان کے علاقوں میں سرگرم ہوگئی ہے ۔
